香港人咩都要快，裝修亦唔例外，因為遲一個月入伙，閒閒地唔見萬幾兩萬蚊租! 咁究竟咩先叫快? 根據好師傅數據，香港地全屋裝修，平均每 100 呎需時 17.7 日 (包埋非工作日)，即係 400 呎的家居裝修，平均需要 2 個月零 10 日。
除左呎數，另一個影響裝修工期的，就係裝修旺季與淡季。一年入面，暑假最多人裝修，熟手技工供應自然緊張；農曆新年就係淡季，香港的建材店唔到初七、甚至初十都唔開門，若有訂造家俬，通常涉及內地，佢地物流、工廠休息時間更長。避開上述時間，裝修工期就會較理想。
講到呢度，就一定要話畀大家知，其實一般住家裝修工程，係唔會日日有師傅到場開工的，因為師傅同一時間要處理幾個唔同工程，要安排人手到其他地方開工。想師傅天天把你的場塞滿人唔係無可能，但成本會大幅上升，工商舖裝修就會咁做。
當然，唔同裝修項目對工期影響亦非常大。訂造家俬通常係其中一個需時較長嘅項目，因為師傅做完泥水，要再「覆尺」，才可以叫內地家俬廠開工，來來回回佔去不少時間。而其他水電、泥水、油漆等等項目嘅詳情，影響亦好大。順帶一提，一間屋的裝修呎價，平均來說係越大越平的。當中差異，好多時來自訂造家俬費用，因為大一倍嘅屋，不會有多一倍家俬要造。
除左呢啲，屋苑容許規則都會影響工期，因為好多私人屋苑唔容許周六開工。
上面提到好多因素，戶主都控制不了，不過有一點，想快的戶主一定要留意，就係設計要一早定下來，不要在工程途中改動。
