選單 喜愛清單
保衛愛家,對抗春天的「霉」花
2018-04-18

大地回春,花開處處,春天嘅來臨總令人又愛又恨。潮濕嘅天氣伴隨著一團團擾人嘅「霉」花。係呢個「回南天」,點樣先能令家居保持乾爽舒適,大家又要因此而煩惱啦。

好師傅給你送上家居防霉小貼士,從此防霉很容易。

方法一:窗戶開關要適時

每天早晨和晚上記得緊閉家中嘅窗戶,因為呢兩個時段嘅濕氣較高。關閉窗戶可以阻止濕氣潛入家中嘅機會。其餘時間則要保持室內通風,可用風扇吹一些平常不易通風的地方,以保持陰暗地方乾爽,好似櫃底。

 

方法二:善用工具壓濕氣

濕度較高或者梅雨不斷嘅時候,可以用抽濕機降低室內濕度,保持乾爽,避免霉斑滋生。更可以用長炭或用布將粉筆包好放入衣櫃,即有吸濕作用,可以保護衣物。

 

方法三:輕鬆除霉有妙法

把綿花放進絲襪內,並綁係掃把上,可利用靜電吸走天花嘅灰塵同霉菌。針對廚房嘅霉菌,用檸檬汁同牙膏就可除霉兼除臭。

 

 

 

 

的骰空間大變法
2018-04-18

香港寸金尺土,空間永遠不夠用,加上近年興起二人世界 studio flat 或部屋設計,簡單嘅二三百呎單位,都可以大變法,成為型格嘅的骰舒適空間。

好師傅話善用空間嘅妙法有好多,以下係最常用嘅設計小魔法:

  1. 傢俱盡量架空同靠牆,保留地面及單位中間嘅活動範圍
  2. 魔鏡係空間嘅放大鏡,因為鏡可以擴闊視覺上嘅景深,增加空間感。選用通透感強烈嘅焗漆或磨砂玻璃,更可以有點綴嘅效果
  3. 吊燈係空間嘅大霸王,會造成空間壓迫感,同時分散室內嘅設計焦點。部屋宜用射燈,營造輕巧自然效果

裝修師傅提提你以橫排擺放傢俬,平衡牆身,減少角位出現,可以有效地運用空間。牆身和地板以淺色為主,可以減少壓迫感。

 

 

 

拆除工程要小心,粗心大意麻煩生
2018-04-18

拆除工程係整個整修流程嘅開始。「好的開始是成功的一半」,因此唔好忽略拆除工程。係呢個程序中,要先跟師傅確認拆除嘅時間同項目,小心唔同嘅喉管位置,以及做好屋內物件嘅保護。小心規劃,做好準備,先去開始拆除工程。

時間項目先確認,減少衝突有計傾
有清晰嘅拆除時間同項目係相當重要嘅。因為你需要足夠嘅時間將要保留嘅傢俱搬走,例如電器同爐具等。所以係拆除前,最好先同師傅溝通好工期,可以令自己係工程進行前將東西都搬離施工場地。除此之外,都要係拆除前同師傅係屋內確認一下要拆除嘅地方,並且做下記號同標明拆除嘅尺寸,令大家都有明確嘅位置同大小,以免日後因拆除大小有異而引起衝突。

 

喉管位置要小心,小心檢查最安心
拆除工程中,最常見嘅就係更換水喉。雖然係比較簡單嘅工程,但都有機會發生意外。係換水喉時,特別要留意嘅係洗手間嘅排糞喉,因為一般係唔換嘅。如果想換排糞喉,必須同水電師傅講清楚。如果唔需要換,拆除時必須要同師傅講,否則所有工程完結後先發現問題,就會引起衝突。最好嘅方法就係約好水電師傅同拆除師傅係拆除完之後檢查洗手間,以免日後發生爭議。

 

屋內保護要做足,防止撞擊銀包縮
係拆除嘅現場,裝修材料、工具等東西都好有可能刮花你嘅地板同傢俱。所以係拆除進行之前,就必須要做好屋內物件嘅保護。如果係唔換地板嘅,就要特別注意地板上嘅保護,地板嘅保護可以搵師傅幫你代勞。一般嘅方法係鋪兩層,一層珍珠板同一層木夾板,珍珠板係防止灰塵滲入,木夾板係防止硬物撞擊。此外,要保留嘅門同櫃子都要包好,以免日後被硬物刮花。至於家具同電器,最好就係能夠搬離裝修現場,否則都要用氣泡紙包妥好。

 

好師傅額外提提您,如果拆除工程牽涉空間改動,在動工前最好先諮詢專業人事意見,例如將廚房改建為開放式會唔會涉及消防條例;打通單位會唔會涉及大廈公契、公用空間同樓宇結構等,避免係不知情嘅情況下觸及法律問題或責任,咁裝修就可以進行得安心又放心啦。

 

多花心思,齊做亂「線」設計師
2018-04-18

家中電器多,電線自然多。電話線、上網線、電腦線全都亂作一團,就好似一個個蜘蛛網,不但外觀唔討好,而且容易藏積塵埃。錯綜複雜嘅線團,總令你無從入手,十分懊惱。

其實只要多花心思,大家除左可以解決電線凌亂藏塵嘅問題外,都可以為家居增添藝術感。

好師傅教你變身魔法師,略施小法術,美化家居好容易。

隱身術:有時候,一些電線同接收器會同屋企有一種格格不入嘅感覺,呢個時候最好將佢地全隱藏掉,但現實中並冇叮噹嘅「隱形斗篷」,不過可以自製隱藏法寶。好好利用禮物盒,將電線同接收器放藏入盒中,然後係盒後開一個小孔,就可以巧妙地隱藏佢地嘅不美觀。或用舊書皮覆蓋接收器,可以增添懷舊味道。

變身術:不同顏色嘅電線,加少少想像力,可以變換出不同嘅圖案。無論係簡單簡潔嘅直線排列,定係變化多端嘅圖形,都可以為你家居加上一個主題。只需要運用簡單嘅電線夾或電線扣就可以創造出不同嘅圖案。

易容術:大家都可以運用牆壁貼紙令電線或電掣化成色彩繽紛嘅圖畫。亦都可以運用小道具,將電線同裝飾融合一齊,化身成獨一無二嘅藝術品。

 

 

 

保持家居空氣流通,家人健康好輕鬆
2018-03-28

經過「年廿八、洗邋遢」,大家係新年前已經徹底清潔家居。家居乾淨左,大家住得更舒服自在。但清潔家居係咪已經足夠呢?我地每分每秒都呼吸緊空氣,所以室內空氣嘅好壞,對我地嘅健康都有好大嘅影響。

大家有冇諗過,屋企嘅空氣比街道嘅空氣仲污髒十倍。屋企空氣質素欠佳,容易令我地感到身體不適,例如頭痛、過敏、皮膚疾病等。

好師傅家居小建議,改善家中環境,保持通風你最醒!

1) 避免使用釋放高揮發性有機化合物:空氣清新劑、殺蟲劑、洗衣粉、塗改液等都含有乙醛、苯及一氧化碳等化學物,空氣質素會因此受影響,亦會令人更容易有小毛病,嚴重更會導致肺病。

2) 保持家中空氣流通:經常開啟窗戶,保持良好通風,可以有效地減少家中因煮食而產生嘅二氧化碳、甲醛、丙烯醛等含量。同時都可以降低空氣濕度,減低發霉機會。長此下去唔單只可以改善皮膚狀況,更可改善呼吸道問題。

3) 減少使用冷氣機:冷氣機係香港潮濕同溫暖嘅環境內,容易積聚大量細菌同微塵。而且開冷氣嘅時候,帶細菌嘅原浮粒子會隨著冷氣輸出,散播係家中空氣。常見細菌包括沙門氏菌、退伍軍人桿菌同大腸桿菌等。定期清洗隔塵網同確保開啓冷氣時室內有足夠新鮮空氣,都可以減少細菌滋生。

4) 嚴選建築材料:長期吸入揮發係空氣中嘅有害物質, 有機會引發身體過敏反應, 甚至會產生中毒症狀。 裝修時可以選取低甲醛含量嘅裝修建材, 例如環保嘅建材。係選擇油漆時都應該小心謹慎, 選擇可以分解甲醛嘅油漆,可以係師傅施工同時進行除醛動作。而且係屋企塗上油漆後,要等到乾透才使用。

 

了解需要才選師傅,平衡設計無晒痛苦
2018-03-28

無論新屋裝修或舊屋翻新,每一次都會墮入一個二選一嘅難題當中。究竟請設計師定係只請裝修師傅呢?兩者分別又係咩呢?無論請設計師定裝修師傅,都各有利弊,要係兩者中二選一的確令人頭痛。其實只要多認識自己,了解你嘅裝修需要就可以聰明地做決定。

好師傅教你認識自己,清楚分析你所擁有嘅條件。然後輕鬆決定自己嘅裝修需要,設計師定裝修師傅就一目了然。

條件一:簡單實際無煩惱,師傅一看就知道
首先,大家要清楚自己對裝修嘅需求,係咪以簡單實際為主,以及著重於基本手工。如果大家只係希望簡單裝修,主要利用傢私去點綴家居,裝修師傅基本上已經可以滿足你的要求。而且裝修老師傅會用心幫你處理每個細節。

 

條件二:平面圖則要畫清,網上尋圖不用驚
設計平面圖係整個裝修設計及施工嘅基本依據,當中包括門窗嘅位置,櫥櫃嘅內裝等等。如果你對裝修嘅尺寸同基本規劃都有一定嘅概念,你就可以捉緊尺寸並表示係平面圖上。但係,如果冇完整同準確尺寸嘅平面圖,就會好容易造成錯漏而需要修改,增加成本。假如擔心自己冇設計平面圖又唔識得畫,不妨上網搵下平面圖黎參考,亦可以收集唔同嘅裝修風格供師傅參考,一般老師傅經驗豐富,基本上只要有圖片,就可以實現大部份設計。

 

條件三: 凡事問師傅,清楚無痛苦
決定前,你可以請裝修師傅到家中行一個圈視察情況,先收聽師傅嘅專業意見,睇睇有咩需要改動。即使自己清楚屋中唔需要太大嘅改動,都應先參考師傅意見。市面上,部份師傅都會提供免費報價,係報價過程中,老師傅可以跟據自己經驗,提供專業意見,幫你搵出必須改善嘅地方。如果需要更改屋中嘅結構或者想將新屋裝修得與別不同,不妨先同裝修師傅談談。佢地都會對於你嘅要求給予專業意見。只要多同師傅溝通,裝修師傅都能夠用心幫你創造一個擁有自己風格而又舒適嘅家。

 

條件四:決定夠果斷,距離成功並不遠
自己嘅決定能力係咪夠果斷對於請師傅係相當重要嘅一環。當你做決定夠果斷,就可以同裝修師傅好容易得到共識,工程將會十分順利。但如果你不夠果斷,係好有可能影響日後裝修嘅施工進度。因為你會為一個很細小嘅地方猶豫不決,例如插頭位置,做完拆,拆完做,做完又拆,咁樣就會好費時。但其實裝修師傅都會提供建議俾大家決定。因此,如果你係一個嚴重缺乏決定能力嘅人,就需要找設計師!

 

條件五:裝修必修有預算,了解需要容易選
設計師同裝修師傅其中一個最大嘅分別,就係價格收費上。以一個 500 呎嘅單位計算,設計師嘅收費一般高三至四成。由於設計師除左為單位設計外,仲有監督裝修進度嘅功能,因此收費較高。其實有經驗嘅裝修師傅都會負責監工,所以只要你做好前期工作,係裝修過程中只需要不時了解進度,其他嘅都可以交俾師傅們幫你打點。